Яйзү хотод тус тусын онцлог бүхий Яйзү боомт, Когава боомт, Ооигава боомтууд байдаг. Тухайлбал Яйзү боомт хар амар болон туна буюу алтан жад загасыг голчлон олборлож, борлуулалтын дүнгээрээ 5 жил дараалан улсдаа тэргүүлж байна. Когава боомтод саба буюу амар загас, ажи буюу морин загас, Ооигава боомтод ширасү буюу загасны жараахай болон зөвхөн Сүрүга буланд байдаг сакүра сам хорхойг тус тус олборлодог.

"Яйзү загасны зах"-аар жилдээ 1.7 сая хүн үйлчлүүлдэг. Яйзүд агнасан шинэхэн загас, загасан бүтээгдэхүүнийг худалдаалдаг 60 орчим дэлгүүр лангуу байрлах ба та худалдан авалт хийх, хоол идэх, мөн захтай танилцах боломжтой.

Энэхүү халуун рашаан нь газрын гүний 1500м, ойролцоогоор 19 сая жилийн өмнө үүссэн "Дарь эхийн тогтоц" хэмээх газрын давхаргаас ундран гардаг байгалийн сайн чанарын халуун рашаан юм. Далайн усны 1/2 хэмжээний давсны агууламжтай зөөлөн шүлтлэг чанар нь арьсыг гүнд нь хүртэл чийгшүүлж, дулааныг хадгалдгаараа онцлог. Хөлний рашаан, рашаанд оронгоо Фүжи уулыг харах боломжтой задгай рашаан, загасны боомтын хажууханд байх боомтын рашаан зэрэг 9 байрлалд Күрошио халуун рашаанд тухлах боломжтой.

Яйзү хотод сүшинээс гадна загасаар хийсэн уламжлалт хоолнууд их байх бөгөөд сүүлийн үед хоолны баяр, арга хэмжээнүүд тогтмол зохион байгуулагдаж байна. Хотын иргэдийн бахархал болсон төрөл бүрийн амтат хоол зоогийг амталж үзээрэй.

Загасны боомт Яйзү хотын нэг бахархал нь шинэхэн загасаар хийсэн амтат сүши юм. Дөнгөж барьсан туна, амар загас, морин загас шинэхэн далайн бүтээгдэхүүн салахын аргагүй амттай бөгөөд ширасү хэмээх загасны жараахай, Сүрүга буланд л байдаг Сакүра сам хорхойг та эндээс л идэх боломжтой.

Тэртээ 1830 онд байгуулагдсан Исожиман үйлдвэр нь уламжлалт арга, шинэлэг технологийг хослуулан,чанарын дээдийг эрхэмлэж, Япон улсын Хёого мужийн Тожо Ямада Нишики цагаан будаа, Өмнөд Альпийн нуруунаас эхтэй Ооигава голын цэнгэг усыг ашиглан гар аргаар исгэсэн амтат сархадыг үйлдвэрлэдэг юм. Исожиман сакэ нь Хоккайдо Тоояако-д зохион байгуулагдсан "Их 8"-ын дээд уулзалт, Исэшима-д зохион байгуулагдсан "Их 7" -ын дээд уулзалтын зоогийн ширээнд хэрэглэгдэж байсан бөгөөд энэ мэтчилэн дотоод гадаадын зах зээлд өндрөөр үнэлэгдэж байна. Түүхийн олон хуудсыг элээсэн энэхүү үйлдвэр цаашид ч цаг үеийн шаардлагад нийцсэн Японы уламжлалт сархадыг танд хүргэхээр зорьж байна.

Яйзүд баригддаг шинэхэн кацүо буюу хар амар загас, туна буюу алтан жад загасаар хийсэн кацүобүши(хатаасан хар амар загас), намарибүши(утсан хар амар загас), кацүо но татаки (гадна хэсгийг нь шарж болгосон хар амар загас), цүкүдани(амталж чанасан загас), шиокара(жуузласан загас) зэрэг загас, загасан бүтээгдэхүүнүүд амтлаг сайхан. Мөн күроханпэн(буталж чанасан загас), камабоко(буталж жигнэсэн загас), нарүто ороомог(буталж жигнэсэн ороомог) зэрэг загасан бүтээгдэхүүний үйлдвэрлэл сайн хөгжсөн байдаг.

Токугавагийн үеэс (1603-1867 хүртэл 260 жил) эхлэн загас агнуур өндөр хөгжсөн Яйзү хотын загасны түүхийг танилцуулсан уг музейд модон усан онгоцны хяналтын өрөө, Мэйжигийн үеийн загасчдын сууц, эд хэрэглэл, хуучны бичиг судар, эртний загасчдын ахуй болон Яйзү боомтын хөгжлийн түүхийг өгүүлсэн баримт, эд хэрэглэлүүд тавигдсан байдаг.

Нарагийн тоолол буюу 8 дугаар зууны үед "Якицүбэ но Комичи" хэмээн нэрлэгддэг байсан эртний Тоокайдоо замын дагуу байрлах 30 гаруй өрхтэй уламжлалт тосгоныг Ханазава гэдэг. Гол горхи шуугих уулын модон дунд чулуун хана, модон хавтан ашиглан барьсан хуучны энэхүү тосгон байгал дэлхийтэй нэгдэн түүхийн өвөрмөц өнгө аясыг илэрхийлэн байдаг. Шизуока мужид анхдагч буюу 2014 онд улсын нэн чухал уламжлалт барилгын дурсгалт газраар бүртгэгдсэн юм. Зам дагуу Нара тоолллын үед баригдсан хуучны хийд, Хоккэжи сүм, усан тээрэм, хуучин барилгат байрлах кафе зэргийг үзэхэд нэн сонирхолтой.

Яйзү хотод далайн усыг ашиглан байгуулсан “Фишюна” гэх усан сан байдаг. Сүрүга булангийн усны түвшин нэмэгдэхэд байгалийн ус, зориулалтын санд дүүрч далайн амьтдыг танин мэдэх боломжтой болдог бөгөөд хүүхэд багачууд хөгжилдөн тоголдог. Загасчлах боломжтой хэсэгт сүүдрэвч, сандал зэргийг бэлдсэн байдаг тул ямар ч насны хүн тухлан саатах боломжтой. Мөн дэгээ ашиглан загасчлах боломжтой бөгөөд улирлаас хамааран далайн хар боргоцой загас, нялцгай биет зэрэг баригддаг.

Япон ногоон цайны топ 3 брендийн нэг Шизуока ногоон цайгаар амтат “ногоон цайны какигори” буюу мөсөн амттанг хийдэг. Дотоодын цайны үйлдвэрлэлийн 40%-ийг хангадаг Шизуока ногоон цайг ашиглан Яйзү хотын кафе болон цайны дэлгүүрүүдэд хэлбэр хэмжээ, амт, өнгөний өргөн сонголттой, өөр өөрийн онцлог бүхий какигориг хийж худалдаалдаг бөгөөд нунтаг ногоон цай, байхуу, хуурсан ногоон цай, сэнча зэрэг төрөл бүрийн цайг ашигладаг. Та бүхэн заавал амтлан үзээрэй.

“Яйзү үогаши цамц” нь алчуур болон зуны кимоногийн зөөлөн материалаар хийгддэг бөгөөд салхи сайн нэвтрүүлж, хурдан хатдаг онцлогтой. Анх загасчдаас авсан алчуурыг цамц болгон урлаж, ажлын хувцас болгон ашиглаж байжээ. Орчин үеийн гоёмсог өнгө, хээ бүхий үогаши цамцыг нас насны хүмүүс дурлан өмсдөг болсон бөгөөд хотын захиргаа, хувийн хэвшил, орон нутгийн банкны ажилчид үогаши цамцыг зуны улиралд ажилдаа өмсдөг.

1600 гаруй жилийн түүх соёлыг агуулсан Яйзү сүмийн тухай 900 оны үеийн "Энгишики" гэх сударт бичсэн байдаг. Уг сүм домогт ханхүү Ямато Такэрүг шүтээн болгон "Ириэдаймёожин" хэмээн нэрийддэг. Жил бүрийн 8 сарын 12,13 өдрүүдэд "Тоокай но Арамацүри" гэгдэх томоохон баяр зохион байгуулагддаг. Ялангуяа 13 өдөр бурхны ариун жууз хотын гудамж талбайгаар гороолох ёс хийдэг. Уртаас урт ёслолын жагсаалын тэргүүнд арслангийн толгойг дүрсэлсэн модон баг бүхий хүмүүс гудамж талбайг ариутган, бяцхан охидууд уянгалаг хоолойгоороо дуу дуулан гороолдог.

Ринсооин хийд нь Бүнмэй-ийн 3 дугаар он (1471 он) –д Яйзү хотын Когавагийн Эгоношимад баригдаж байсан бөгөөд түүний дараа даяанчийн зөнгийн дагуу одоогийн байршилд шинэчлэгдэн баригдсан юм. Кёохоoгийн 13 дугаар он (1728он)-д сэргээн засагдсан бясалгалын хийдэд одоо ч шашны үйл хийгдсээр байна. Мөн энэхүү хийд нь барын чих цэцгээрээ алдаршиж, жил бүрийн 6 сард 300 гаруй бут цэцэглэдэг.

Шинто шашны Ойхачимангү сүм нь Хэйан тоолол буюу 980 онд Ойгава голын лус савдагийг аргадан баярлуулах зорилгоор баригдсан бөгөөд жил бүрийн 3 дугаар сарын 17 өдөр “Фүжимори будаан талбайн ёслол”-ийг үйлддэг. Энэхүү ёслол нь атар газрыг хагалахаас будаагаа хураах хүртэлх бүх процессийг илэрхийлсэн уламжлалт бүжиг бүжиглэж, баялаг үр тариа, голын ариун ундаргыг бэлэгдэн залбирдаг. Энэ ёслолыг 1977 онд соёлын биет бус өвөөр бүртгэсэн.

Японы хаврын өнгө Сакура. Яйзү хотын гудамж талбай гоёмсог сакура цэцгээр өнгө юугаа засанхан байдаг. 2 дугаар сарын дундаас эхлэн Асахина голын зүүн эрэг дагуу 2км урт “Яманотэ” сакура цэцэглэхээс гадна, Сүмирэдай-д байрлах Кияа голын эрэг дэх сакура цэцгийн модод, Фүжи хайрхныг тольдон харах боломжтой Точияма голын Фүжими сакура зэрэг олон байршлуудад үзэсгэлэнт сакура цэцгийг харах боломжтой

Боомт дээр усан онгоц тосох хүмүүст олз омог их байснаа(тайрёо-их загас) илэрхийлэх зорилгоор энэхүү далбааг өргөдөг байсан бол орчин үед усан онгоцны чимэглэл болгон, анх далайд гарах ёслол, боомтоос хөдлөх, буцаж ирэх, цагаан сарын үеэр мандуулдаг болсон юм. Далай дээр холоос харахад ч нүдэнд тусахуйц өнгөний хослол бүхий хээ угалзнууд нь эрдэнэсийн хөлөг онгоц, тогоруу, яст мэлхий, мандах нар зэргийг илэрхийлсэн байдаг бөгөөд олз омог, осол авааргүй байхыг бэлэгддэг. Загасчдын хотод одоо ч энэхүү тайрёокиг гар аргаар нямбайлан урласаар байна.

Яйзү хотод Фүжи уулыг тольдон харах боломжтой олон газар байдаг. Хаматомэ зэрэг далай эргүүдээс Сүрүга булан, Фүжи уулын үзэсгэлэнт зохицлыг, Когава боомтоос загас агнуурын хөлөг онгоц, Фүжи уулын зохицлыг харахад тун сайхан. Мөн хот дотроос ч Яйзү хотын бэлэг тэмдэг Такакүса уул түүний цаана дүнхийн харагдах Фүжи уулыг харж болно.